មណ្ឌលគិរី គឺជាដែនដីក្រហមប៉ែកភាគខាងកើតប្រទេសកម្ពុជា និងជាខេត្តដែលមានផ្ទៃដីធំជាងគេ តែមានប្រជាជនតិចជាងគេទៅវិញ។ ខេត្តមណ្ឌលគីរីជាតំបន់ទេសចរណ៏ធម្មជាតិធំមួយនៃព្រះរាជាណាចក្រកម្ពុជា ដែលមានតំបន់ទេសចរណ៏ធម្មជាតិជាច្រើនដូចជាទឹកជ្រោះប្រកបដោយហ្វូងមច្ឆាជាច្រើនប្រភេទ ព្រមទាំងរុក្ខជាតិ សត្វព្រៃ ព្រៃកោងកាង និងភ្នំតូចធំជាច្រើន តែក៏មានទីតាំងខ្លះមិនទាន់មានអ្នកស្គាល់ និងមានអ្នកទៅដល់ផងដែរ។
ដោយក្នុងនោះ « ទឹកធ្លាក់ឡែងម៉ាហោក » ក៏ត្រូវបានគេដឹងថាទីតាំងមួយបែបធម្មជាតិ ប្រៀបបីដូចជាពេជ្រមិនទាន់ច្នៃ បង្កប់ទេសភាពទឹកធ្លាក់ស្រស់ស្អាតស្ទើរតែមិនគួរឱ្យជឿ និងមិនសូវល្បីល្បាញ ឬមានអ្នកទៅកម្សាន្តនោះឡើយដោយសារតែស្ថានភាពពិបាកធ្វើដំណើរ គឺការប្រើម៉ូតូតែម្តង។ តែបើបានទៅកម្សាន្តហើយ ប្រាកដជាជាប់ចិត្តនឹងទេសភាពនេះជាក់ជាមិនខាន។
គួរឱ្យដឹងផងដែរថា « ទឹកធ្លាក់ឡែងម៉ាហោក » ស្ថិតនៅភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី មានចំងាយផ្លូវពីស្នាក់ការបរិស្ថានស្រុកអូររាំង១៧គីឡូ ធ្វើដំណើរតាមភូមិអណ្ដូងក្រឡឹង និងឆ្លងកាត់ស្រែហ្យេវ ប្រើរយៈពេល ២ ទៅ ៣ម៉ោង អាស្រ័យលើអ្នកពូកែបើកម៉ូតូ៕
ប្រភព៖ ខេត្តមណ្ឌលគិរី
