រមណីយដ្ឋានភ្នំដោះក្រមុំ ស្ថិតនៅទីរួមខេត្តមណ្ឌលគីរី ដោយជម្រាលភ្នំខាងត្បូងទល់នឹងប្រលានយន្តហោះ ភ្នំនេះ គ្របដណ្តប់ទៅដោយវាលស្មៅ ពីចង្កេះភ្នំរហូតដល់កំពូលភ្នំ។
ភ្នំដោះក្រមុំ ជាភ្នំដ៏ស័ក្តិសិទ្ធមួយ នៅក្នុងខេត្តមណ្ឌលគិរី។ នៅលើកំពូលភ្នំ មានស្តូបបូជាដែលមានរូបសំណាក សម្រាប់ប្រជាពលរដ្ឋនៅក្នុងខេត្តមណ្ឌលគិរី ធ្វើការបន់ស្រន់ ដែលគ្រប់គ្នាហៅថា «អ្នកតាស្រុះ » ។ គេហៅភ្នំនេះថា ភ្នំដោះក្រមុំ ដោយសារសណ្ឋានដីភ្នំនេះ មានរាងដូចសុដនរបស់ស្រ្តីក្រមុំ។ នៅក្បែរស្តូបបូជា មានការរៀបចំកន្លែងអង្គុយសម្រាប់មើលទេសភាព ជាពិសេសសម្រាប់ពេលថ្ងៃលិច។ យើងអាចមើលទិដ្ឋភាពនៃទីរួមខេត្តមណ្ឌលគិរិ ពីលើកំពូលភ្នំនេះបាន នៅលើកំពូលភ្នំ មានផ្លាក « I Love Mondolkiri » សម្រាប់អ្នកចូលចិត្តថតជាមួយសញ្ញាសំគាល់ខេត្ត។
រមណីយដ្ឋានភ្នំដោះក្រមុំ ត្រូវបានអ្នកជំនាញផ្នែកវប្បធម៌ គ្រោងដាក់បញ្ចូលជាសម្បត្តិបេតិកភណ្ឌជាតិ និងបេតិកភណ្ឌពិភពលោកនៅថ្ងៃខាងមុខ។ តំបន់នេះ មានចំណុចពិសេសច្រើន ដូចជាទីតាំងនៅក្នុងក្រុង ប្រមូលផ្ដុំដោយជំនឿជនជាតិដើមភាគតិចមានការឲ្យតម្លៃពីជនបរទេស និងព្រះមហាក្សត្រខ្មែរ ពិសេសជាទីតាំងកុលសម្ព័ន្ធប្រវត្តិសាស្ត្រ របស់ជនជាតិដើមភាគតិច ហើយនៅទីនេះក៏ជាកន្លែងអំណោយផលបំផុតសម្រាប់ការថតរូប និងមើលថ្ងៃរៀបលិច។
ភ្នំដោះក្រមុំគឺជាបូជនីយដ្ឋានទេសចរណ៍មួយនៅក្នុងខេត្តមណ្ឌលគិរីដែលជនជាតិភាគតិច និងខ្មែរធ្វើការគោរពបូជាតាមជំនឿទំនៀមទម្លាប់របស់ពួកគេ។ប្រជាជនភាគច្រើនជឿថាព្រលឹងវិញ្ញាណស័ក្តិសិទ្ធិអារក្ខអ្នកតាដែលនៅលើភ្នំសម្បូរស្មៅនោះបានថែរក្សាពួកគេឲ្យមានសេចក្ដីសុខសុវត្ថិភាព និងមានសុខភាពល្អ។ ជារឿយៗពួកគេក៏ឡើងទៅលើភ្នំដោះក្រមុំដើម្បីបន់ស្រន់សុំជោគលាភក្នុងមុខរបរនិងសុភមង្គលក្នុងគ្រួសារ។ ស្ថិតនៅក្នុងភូមិដោះក្រមុំឃុំសុខដុមស្រុកសែនមនោរម្យខេត្តមណ្ឌលគិរីភ្នំនេះដើមឡើយឈ្មោះថាភ្នំឪយល់ក្រោយមកគេហៅជីហូ ជីវ័ន ឬស្រុះប្លង់៕
